Trivnaðarsamskipari í Sunda kommunu

Starvið:

Trivnaðarsamskipari er eitt fjølbroytt samskipanarstarv við eini rúgvu av spennandi uppgávum knýtt at. Bygnaðarliga er starvið skipað undir fíggjar- og fyrisitingarleiðaranum.

Tínar uppgávur eru millum annað at:

• Fyrireika og vera skrivari til fundir hjá trivnaðarnevndini.
• Fylgja upp at mál, sum eru samtykt av trivnaðarnevndini, verða sett í verk.
• Taka tær av samskiftinum millum kommununa og stovnar undir trivnaðarnevndini, sum ungdómshús, dagtilhald, skúlar, dagstovnar o.o. og at stuðla undir tiltøk, ið hesi og onnur hava.
• Røkja og samskipa ávísar uppgávur á Tekniska-, Vinnu- og Umhvørvisøkinum.
• Røkja heimasíðu og sosialar miðlar hjá kommununi.
• Samskipa og taka sær av øllum lýsingum og PR annars hjá kommununi, bæði til borgarar, vinnu og ferðandi.
• Samskipa tiltøk hjá Sunda kommunu og leiklutin hjá kommununi við onnur, ið fyriskipa tiltøk í Sunda kommunu.
• Samskiftið við ítróttarfeløg, frítíðarvirksemi, áhugafeløg, trúarlív, einstaklingar v.fl.

Um teg ynskja vit, at tú:

• Hevur royndir við samskipan, og dámar væl at “hava nógvar bóltar í luftini”
• Dugir væl at miðla, hevur kunnleika til ymsa tøkni innan samskifti og helst eisini royndir sum samskiftisfólk.
• Dugir væl at skriva og orða teg á føroyskum.
• Hevur royndir við at skriva og leggja tilfar út á heimasíður og sosialar miðlar.
• Hevur royndir við journalskipanini 360, men hetta er ikki eitt krav.
• Ert ágrýtin, arbeiðir miðvíst, dugir væl við fólki og hevur evni og hegni til bæði at arbeiða sjálvstøðugt og í toymi.

Setanarviðurskifti:

Starvið er eitt fulltíðarstarv og verður sett sambært sáttmála millum Starvsfelagið og Kommunala Arbeiðsgevarafelagið.

Meiri fæst at vita um starvið við at venda sær til Jóannes A. Prestá fíggjar- og fyrisitingarleiðara í Sunda kommunu á 297205 ella [email protected].

Skrivlig umsókn, saman við avriti av prógvum og møguligum viðmælum skulu vera okkum í hendi í seinasta lagi mánadagin 13. desember 2021 kl. 12.00.

Umsóknir skulu sendast til:

[email protected] 

Merkið umsóknina “Trivnaðarsamskipari”

Kommunan tilskilar sær rætt til at lýsa starvið leyst av nýggjum, um ikki nóg nógvir ella skikkaðir umsøkjarar eru til starvið.